Pengemaskina Paxar

Dagleg leiar Atle Gandrudbakken og dei andre tilsette ved Paxar NTP kan gni seg i hendene. No ventar det nemleg solide bonusar - og bedrifta i Gaupne har meir enn nok pengar å ta av.

Ekstra utbetalingar

I 2002 hadde dei eit overskot på 2,7 millionar kroner, i år har dei auka dette til nærare 6 millionar kroner. - Det har vanka litt ekstra utbetalingar, seier ein nøgd Gandrudbakken, som forklarar oppgangen med nye investeringar, dyktige folk og effektivisering.

Selde til Paxar

Atle Gandrudbakken selde i fjor sommar bedrifta si til Paxar-konsernet. Og etter amerikanarane sitt inntog har salet av merkelappar til klede meir eller mindre teke av. Gandrudbakken legg ikkje skjul på at det har betydd mykje å bli ein del av eit stort internasjonalt konsern. - Vi får ein heilt annan marknadstilgang, seier Gandrudbakken.

Fleire arbeidsplassar

Paxar NTP er blitt den største og viktigaste arbeidsplassen i Luster, med 88 arbeidsplassar. Målet var at bedrifta skulle ha 100 tilsette i løpet av 2005, men produksjonspresset er så stort at dette målet kan bli nådd alt neste år, seier Gandrudbakken.